我同我老公都勁中意食牛，無牛不喜，而牛腩河更是常常吃，週末太懶，落街食碗牛腩河醫肚就滿足曬~
成日都會話邊間邊間既牛腩好食，湯底好正。其實，係屋企都一樣可以煮到比出面更好食更好味既清湯腩，仲要完全零味精，勁滋味。
因為林先生成日出差，今次仲要差不多半夜才回到家，你叫佢3餸1湯白飯任裝，我估佢都唔會有胃口架喇。所以，不如整個清湯腩俾佢食，熱辣辣又有湯飲下，中意既加個河粉或者烏冬，夠曬滋味。
我手頭上都有唔少煮牛肉湯既方法，味道一樣棒 (遲下有機會分享~)，但還原基本步，想飲一個原汁原味的牛肉湯，調味料及配料最好愈少愈好。 而且手到拿來，易於操作。
今次介紹呢個，又係一個絕無失手，平民價錢高檔滋味的清湯腩做法。
材料: (1-2人份量)
1. 牛坑腩一斤 (我老公一個人食曬成斤牛腩同蘿蔔加兩份烏冬-.-)
2. 白蘿蔔一條 (可加可唔加，不過我中意食煲到入曬味既蘿蔔，反正都係要煲，順手放落去~)
3. 香葉-10片
4. 八角 一粒
5. 清水
1. 先將牛坑腩洗淨，切塊。白蘿蔔去皮切塊。香葉及八角沖一沖待用。
2. 開鍋水滾起後放入牛坑腩汆水撈起待用。
3. 開一鍋清水，放入牛坑腩，白蘿蔔，香葉，八角，開火滾起後轉中火煲1小時後轉小火煲1-2小時。熄火加入鹽調味，灑上芫荽蔥花即可。
註:
1. 清水的份量為4大湯碗水的份量，或是清水最後煲至最後淨返一半水的份量時就差不多了。
我今次就是用4-5大碗湯碗水的份量煲至最後剩2碗湯的份量。因為是清水煲的緣故，更加要煲耐少少及水的份量變少一半才夠入味。
2. 喜歡的亦可以加雞湯落去煲，一半水一半雞湯，但我想健康些及原汁原味，純用水就可以了。又或者最後落鹽及雞粉調味。
3. 想慳時間可以用高壓煲，全部材料加水放入蓋上，滾後轉細火煲1小時即可。
開鍋水滾起後下牛腩汆水撈起
一大鍋清水加入所有材料，煲至淨一半水的份量就差不多。
搞掂~超級原汁原味又簡單的清湯腩。
我老公係門口已經話成條走廊都聞到牛腩香味，半夜12點好邪惡~一開門俾佢已經問我煮好未~ 睇黎我都寵壞左佢，我以為佢咁夜返到黎應該冇咩胃口至岩架嘛，點知又話想要淥烏冬配牛腩湯....仲要唔係一包包準備好曬的烏冬，而係烏冬麵條，我要另外開鍋水淥完過冷河!
不過，不得不說，我們寧願麻煩少少淥烏冬麵條食都唔會點煮那些一包過的烏冬。
因為口感真係超彈牙及滑溜。
以下牌子是我們近期成日煮的，又是一個蕃茄切塊，加雞湯加烏冬已經可以媲美出面餐廳的蕃茄湯烏冬。
講返牛腩湯烏冬先。
咪就係一份烏冬麵條用滾水淥約20分鐘後撈起過冷河或唔過冷河，倒入牛腩湯就可以。
我老公一個人食曬兩碗湯碗咁大既牛腩蘿蔔加兩份烏冬-.- 原本仲諗住俾佢第2日早上做早餐架麻~~~
沒有留言:
張貼留言