2019年11月12日 星期二

羊肚菌的功效與作用

【補脾胃,增強抵抗力】羊肚菌煲雞

米媽:母乳媽媽不易做-(上集)


米媽趁著搭車睇醫生,就來說說米媽第二胎的母乳路吧。 篇文很長,大家也未必會睇,上胎其實米媽也有記錄,但寫到一半就放棄了,因為確實不是片言隻語可以道出的。每個人奶媽都有自己既一個故事。


米媽也希望不是每個母乳媽媽都經歷咁波折,可以很順利的餵母乳。
有人成日話食母乳唔係必須,奶粉都夠曬營養,以前個個都係咁食大的,無錯。 米媽好認同。米媽認為媽媽的愛,唔會因為你餵母乳或奶粉而有所不同。媽媽的愛是最重要的。所以,米媽想對所有媽媽說,想餵母乳或餵唔到的,都要放鬆心態,知道媽媽的愛不會變這一點。

但其實大家可能唔知道點解餵母乳媽會咁堅持,有時候係因為果種親暱感,只有你俾到佢既滿足感,佢因為食奶奶而出現的傻傻醉樣,滿面奶水既醉樣。撲到你乳房上傻傻的滿足樣。你會感覺很完滿,你會感覺到我是媽媽。媽咪願意給你你所需要的。當你唔知咩事扭計時,一埋身就會靜靜的滿足的啜啜啜,只有媽媽才可以做到,可以安撫到你。呢個係米媽點解咁想餵人奶既原因。

米媽呢?米媽是一個很倔強,很捱得,為了一些認為好的事或為愛的人會付出一切,包括很忍得痛。

米媽天真以為,有第一胎經驗,第二胎做足準備,一定可以比第一胎餵得好,而且可以餵得更久。原來都真的不是必然。 因為體質問題,天生多奶,懷孕🤰🏼時就已經谷奶谷到去格肋底,兩邊都生了副乳腺。 生完小花,米媽是全埋身的,除了開刀第一天米媽夜晚有一次是補奶粉的,第二天可以下床後,就每餐都行去餵奶房埋身餵。基本上餵一小時,下一餐一小時後又來。 好像係第三天,米媽乳頭已經損了,而且谷奶痛,婦科醫生來檢查時,
醫生👨🏼問米媽:你怕唔怕辛苦
👩🏻:唔怕。
👨🏼:咁你夜晚唔好補奶粉,全埋身。
👩🏻:好。
所以,餵奶房每晚唔同時間都有米媽係度,基本上餵奶房好多時只得米媽一個係度餵。成個lobby ,房,都是靜靜的。

嬰兒初生吃奶與媽媽的乳頭都是需要適應的。米媽頭幾天很無助,乳頭好痛,花花好大力,好似食既位置唔岩,但餵奶房既姑娘應該很忙吧,唔會主動教你,記得開完刀後,仲插住尿袋,手仲吊住止痛藥,第一次埋身。姑娘推左bb埋黎,叫我埋身。母乳姑娘就直接將bb塞落乳頭度就走了。 我連請教既機會都無。之後當然甩嘴左幾次,米媽要禁鐘叫人,叫左幾次都等好耐。有時直情要再禁鐘重新叫過先黎。黎親都唔係好耐性的。所以米媽都唔敢再禁鐘。自己看著辦。

只係所以,很無助呢... 之後想說花花食到就可以,乳頭痛少少唔怕,忍到的。於是,一兩餐後,乳頭就損了...花花再食,就每一下都要充滿勇氣,俾佢食,果種痛好似閃電咁痛貫穿成身。 米媽都叫做生過餵過。好難想像第一胎既媽咪遇到咁情況會點。

第三日開始谷奶,醫生👨🏼黎檢查時,就係講過,夜奶唔好補奶粉,全埋身。於是第三晚開姑,較定鬧鐘10:3000:0002:3004:3006:3007:30有時次數甚至更密,餵奶房姑娘會打入黎話bb餓,你餵唔餵。係餵奶房時,米媽好多時好無助,母乳姑娘拎bb隊落你胸後,就走了,之後就各自修行,得三日人仔,食食下就訓左叫唔醒,有時又掃唔到風,食食下又噴奶嘔奶,禁鐘叫母乳姑娘又要等好耐先黎🤦🏼有時好彩遇著當值果個好既會係度教你叫醒佢,再幫bb埋身時食果下個嘴型整好啲先走。 就算乳頭損左問母乳姑娘佢地都無乜幫助。遇著唔好既...你知道果日餵奶🤱🏻你都係靠自己,唔好禁鐘叫人幫手...所以呢..已經好攰,開刀傷口又痛,乳頭損,唔識餵,無人教,谷奶唔知bb點先食得好既情況下,米媽幾捱得都覺得有啲崩潰。 果晚,11點幾時,其實簾都已經熄曬燈,米媽餵完後返到房,打俾米爸,突然對住電話,無出到聲,啲眼淚💧已經不斷流,斷斷續續細聲驚嘈醒其他人,米爸問咩事,👩🏻 ..我覺得我好似餵得唔好..又無人幫手..個胸又漲到好痛好熱..自己對住電話喊完一陣就好返啲就再訓一陣又去餵奶。

黎到第四晚,米媽心諗,捱多一晚就可以返去了。點知黎到夜晚10:30餵完果轉,0200再起身,全身發冷,想忍住打冷震落床,落唔到,嘗試過幾次掀被落床,都唔得,係由心入面凍出黎,牙齒,手,面,身腳都震曬,上床即刻冚曬被想等身暖啲,飲埋熱水,但係都唔得。最後要禁鐘叫姑娘俾多兩張被黎冚住。 再用水樽即刻倒左一樽熱水擰實攬住佢, 02:10,個心諗住要餵奶,於是披住兩張被,攬住水樽,慢慢忍住發冷震住咁行去餵奶房坐低等餵奶。餵奶房得米媽同花花,母乳姑娘知道米媽發冷震曬都無問侯無幫手.. 米媽都唔理咁多,餵到花花就夠了。

👩🏻對花花講: 花花,媽咪愛你,你慢慢食。 (米媽好捱得,亦好正面,係咁同自己講會慢慢好)

當凌晨三點仲係餵奶房餵到一半時,出面櫃台既姑娘主動黎問候米媽、(而唔係餵奶房既母乳姑娘... 護士: 你點呀,你仲有無咁凍?你應該係谷奶。👩🏻....好凍..(抱住花係餵奶房遮住簾餵奶時估唔到會有人會走黎問候...一時忍唔住對眼熱一熱喊左..
護士:做咩喊呀
👩🏻:無...我唔知點做好..好似好無助又做得唔好咁..
護士:唔會,等陣你餵完黎搵我,我幫你手揸清佢,你就舒服啲。

於是,米媽係第四晚估唔到會遇到人幫。 突然繃緊,咬牙左幾日既精神一放鬆就喊。果晚護士幫我用手擠奶時,其實胸好痛,乳頭好痛但米媽無出過聲。 護士話:餵奶0者,都係肉體上攰同痛。 以後教細路先最難。 米媽諗諗下,又講得好岩。真係應該咁諗又會輕鬆返啲。 多謝呢位護士既出現,唔係佢職責黎,係佢自己想幫媽咪既心..好感恩,希望佢事事順利。呢位天使姑娘叫蘇碧燕。 佢矮坐係米媽面前時,米媽望住佢名牌,說過要記得佢。如果你地識佢,記得話佢知,佢幫了很多媽媽,生完真的很需要支持。

到最後第五日,第六日朝出院要出院,可能知道前晚我餵奶房喊同講過啲母乳姑娘問題。所以有母乳姑娘顧問黎搵米媽,好詳細咁教米媽點樣餵奶,有咩問題都問得。之前咁多日想問想搵人幫既問題都教左米媽...佢好好,好有愛心,出院後亦打過俾米媽,感激。佢叫做李翠欣姑娘。 去到餵奶房,原本態度好差好冷淡既母乳姑娘居然有禮貌又肯講多兩句野,態度改變,米媽無令佢地難做,只係話都係因為我咩都唔講先咁令佢地唔駛擔心。
最後,終於出院喇。米媽覺得係醫院搵到個肯教你既
母乳姑娘真係好重要。 之後出院,米媽搵左催乳師,連續4日黎擠清個胸. 之後米媽成兩星期既母乳路好難..

長話短說,催乳師每次黎用手擠通啲奶,係勁痛..米媽咬住牙無出過聲,催乳師都話米媽好忍得痛。 佢話,媽咪啲奶係用血造的。 只係顏色唔同。你有見過格肋底可以擠出奶的嗎? 米媽就係..多奶多到谷到係格肋底..要擠出黎。

花花每次埋身都食得唔好,又好大力,每次埋身食果下都要倒抽一口氣忍住個閃電刺痛。

乳頭損左流血. 繼續埋身繼續泵奶。

之後開始兩邊胸同乳頭都無間斷閃電咁刺痛。去搵健康院母乳姑娘話真菌感染搽藥膏,醫生叫我沖涼開水淋時,用毛巾將乳頭塞左果層皮捽穿佢,等乳腺通返。 所以..米媽又係返屋企即刻去沖涼忍住痛用毛巾擦損個乳頭等層皮甩...如果叫米媽再做第二次可能未必做得出,最後都無好到,果晚仲谷奶塞奶發高燒...39度幾...

第二日去睇醫生,急性乳腺炎,開一星期抗生素。食到一半時感冒,再加抗生素....同一時間食緊三種抗生素,前後食左三星期抗生素。米媽決定回奶,因為食緊抗生素兩星期個胸一樣痛..食回奶丸加回奶茶,食物等..啲奶都收唔到,再食多一星期回奶丸。最後奶收到8成。但個胸仍然無間斷痛.... 最後,米媽去睇胸科,照完仍一樣,醫生話要等身體炎症慢慢好。


米媽體質問題,太多奶所以點都塞點都痛..同第一胎差唔多,但今胎更嚴重。米媽回奶後..等胸無再痛..就決定再重新上奶... 大家都叫我唔好再餵,每日見住我咁痛住餵,不斷睇醫生,幾個醫生都叫米媽收奶,健康院母乳姑娘都覺得米媽慘,叫米媽要停奶,請催乳師黎通奶,又餐餐要埋身都覺得辛苦。果種痛係就算擠清曬,成個胸軟曬都仲keep住刺痛...所以米媽決定收奶,但決定收奶時自己都已經諗住之後再試下上奶,等奶量少返應該唔會再咁痛。成個坐月期已經不斷睇醫生。

米媽都唔知點解. 無諗啲咩,就係想試下自己可以做到幾多就幾多。之後就開始重新上奶喇。做媽咪有樣失憶,就係好快會唔記得自己點痛到入心入肺點辛苦法,一心只諗到個b. 盡力試吓。

當中埋身餵時要袒胸露臂,呢邊餵時另一邊又滴奶,又會經常谷奶谷到石頭胸,或者乳頭係咁滴奶成衫濕曬..乳腺炎等等..呢啲或多或少係每個母乳媽媽既經歷。

至於點樣收奶後重新上奶就下次再講。(米媽都分左好多次打呢篇文,因為忙所以都是用零零碎碎的時間草草記下大概,其實當中感受頗深。

最後米媽想講多次,米媽認為媽媽的愛,唔會因為你餵母乳或奶粉而有所不同。媽媽的愛是最重要的。所以,米媽想對所有媽媽說,想餵母乳或餵唔到的,都要放鬆心態,知道媽媽的愛不會變這一點。最重要身心健康才可以照顧好小孩子。

米媽唔特別,只係一個平凡嘅媽媽。呢啲經歷過左就得了,係生活上既一些經歷。跨過了就唔係咩一回事了。
米米,花花,媽咪真係好愛你們,他日,願你健康飛翔。

更多米媽日常及介紹動態,可以去米媽IG: Sici Chong



2019年11月6日 星期三

【增強抵抗力補身打底】燉瘦肉汁



米媽一直都好推介身邊既親友燉瘦肉汁補身或當日常調理打底增強抵抗力。

先講燉瘦肉汁有什麼好處?
溫而不燥,補而不燥。
增補元氣,精力,長肉,增強抵抗力。
恢復體力

對不同的人都有好處。
1.    懷孕中,幫孕婦補身而不燥,而且好長胎。對胎兒有益。
2.    產後可以即時飲用補身,不怕燥,而且餵哺母乳更有營養
3.    街外面太多細菌,及病菌,流感, 特別學校小朋友容易交叉傳染,所以大人小朋友定期飲燉瘦肉汁可以增強抵抗力
4.    病後飲用更快恢復。
5.    平時捱夜多,可以恢復體力

簡單來說,燉瘦肉汁是最簡易容易準備,而且對身體很有益,滋陰平和的湯汁。大人小朋友孕婦產後,病癒後,以及老年人都有好處。

如何準備?
燉完有一碗瘦肉汁的份量
材料:
1.    瘦肉(無肥)—一斤
做法:
1.    將瘦肉洗淨切碎/細粒/剁碎
2.    準備一個燉盅, 先將一個飯碗反轉放入盅內。
3.    將瘦肉平均鋪在反轉了的碗上。
4.    蓋上蓋,燉4小時。
5.    將瘦肉取走,揭開碗,裡面便是瘦肉汁,可以飲用。

米媽筆記:
1.    燉瘦肉汁最好買無肥的瘦肉或肉眼
2.    一斤瘦肉是一飯碗瘦肉汁份量
3.    以個人飲用經驗,小朋友5歲每星期飲一至兩次,每次半碗左右。


以上食譜由絲房菜,米媽提供。
有更多食譜以及日常育兒分享,可以關注: