係觀塘住開既人，大部分都應該食過裕民坊巷仔果3間粉麵。我老公更是由細食到大。近兩年一來市區重建，二來租金貴到離曬譜，執得一間得一間，連我們最鐘意食既8記都執埋...有時經開見到條巷仔好冷清都會感嘆唔通以後淨係可以去APM 食壽司，FOOD COURT或者黎黎去去果幾間餐廳? 街坊餐飲唔見曬，地道粉麵唔見曬，城市發展淨係汰弱留強，你捱唔起貴租請執，你食唔起中環價50蚊一碗麵既，請啃包或者返屋企食。我而家見到既淨係觀塘區既發展方向少了點人情味....呢區既特色慢慢迫成單一化發展。
不過，好開心冷巷既其中一間麵家仲堅持到另外搵地方再開過。合興粉麵搬左去瑞和街市側邊，地方細細但係夠光猛同冷氣十足。質素仍然維持，最緊要價錢沒有大幅上升，十分有良心，照顧了大家的荷包。
我同老公叫左牛雜河，牛腩雲吞麵，雜丸，炸魚皮(基本上我食-.-)。牛雜份量十足，沒有太多肥膏，爽口。25蚊一碗....去邊到搵。
一碗麵，不只是飽肚，也是大家的共同回憶。往昔辛苦地打拼搵一餐溫飽，現在人大了有能力的同時，卻忘記了這些街坊餐廳陪你走過的日子，城市發展亦容不下它們。說不過去。
合興粉麵家
地址 :觀塘崇仁街91號地下
電話 : 2389 4471
平均消費 : 40蚊以下
沒有留言:
張貼留言