今天我們都學習先欣賞小朋友做得好的地方作為與子女開始的對話先好嗎
真正相信小朋友，可以為佢地自己既成績負責，而唔係為家長既期許而做。
給小朋友有機會去參與自己的學習計劃及成果
考試前，大約好似有3個星期時間準備考試，米媽曾問過米米，每天一份額外練習，你應付到嗎。米米會表達，星期一，二會比較忙，未必可以。 於是，星期三至日，可以做1-2份課外練習。 當然，有時特別活動及聚會又會有變動。
到考試前一些日子，米米有一次默書不合格，米爸其實嬲嬲地，因為覺得默書係付出幾多就有幾多，今次唔同合格同佢平時表現唔同，而最重要既係前一晚問米米溫成點，米米話溫好左。 米爸唔會主動去鬧米米，反而返黎同米媽商量，同米媽講，米米咁，我其實好嬲，應該點處理，點搵佢傾。
米媽同米爸講， 默書個分數代表左佢投入左幾多，我地想佢之後可以認真或盡力，咁就要問佢點樣做會好D。同時亦都要諗下點樣幫佢，因為老實講，小朋友545AM 起身直踩到夜晚9:00PM， 專心度有限，大人都頂唔順啦，佢多過12小時喎，企起佢角度同年紀上睇下，而唔係質問或責備佢點解默書咁低分，因為佢知既話，佢就唔會咁做啦～～
於是，3個人一間房。
米媽出聲：
米米，你今次默書好低分，係咪默書時唔記得？
米： 係呀，我溫唔熟，突然唔記得
米媽： 如果係咁，下次我地點樣可以溫熟D？
米： 早少少溫
米媽： 媽咪覺得你午餐後之後玩完先安排30分鐘咪埋眼休息，之後先開始溫習做功課，原因想等你腦清空下，你覺得點？ （ 米米平時放學後145-3:00 係食飯同休息時間）
米： 可以試下既
米媽： 同埋我地試下早D開始， 係默書前3日，媽咪幫你默一次，等你知道你大概咩字要留意多D，你覺得咁會唔會好D？
米： 好呀
於是，下一次默書成績，米米返黎話都WORK 喎。變成佢自己既經驗了。
小朋友需要家長睇到佢地既付出，讚賞佢地既努力，先讚後改善會加強小朋友自信心
今次考試，主要都係每日做一份課外練習，學校書本就交俾米米自己負責。
今日放學，米米話派曬成績喇。
米媽：考成點呀
米米： 麻麻地
米媽： 係咪好難呀
米米： 都算係，兩科9字頭，一科8字頭，中文聆聽考得好差
米媽： 幾好喎，3科都考得。 咁中文聆聽幾分
米米： 65呀
米媽： 係咪好難
米米： 係呀，好多人都唔合格
米媽： 咁最高分果個幾分呀
米： 70分
米媽： 咁份卷應該都難，你考到65都唔錯喎。下次我地呢方面加強下
米：好呀
米媽： 你滿唔滿意今次整體成績呀
米米： 一般
米媽： 我覺得有好多都做得好，如果係D大意既位再留意下相信會更好，我地下次一齊研究下點樣好D？
米：好呀
題外話： 小朋友真係做到，今日做唔到唔氣餒，而係不怕失怕繼續試。
呢份勇氣需要家長去付予去支持。
如果小朋友考99分時，你會點反應？
1. 你有無搞錯，果一分你都錯，你連個標點都漏，明明可以100分，咁無用架？
2. 哇，做得好好，盡左力考到咁好成績，都係因為你既付出。你真係做得好好。
如果你係小朋友，俾家長迫住語言恐嚇，恨鐵不成材，甚至用禮物去公園做利誘下，無功都有勞，終於考完試拎到成績表。
家長既反應係咁，
兩者之下，對小朋友既思想同成長，又會唔會有唔同呢？大家都一樣係拎99分
大家可以思考一下。
係咪做一個聽話既小朋友無自己想法參與就係最好既性格成長？
有時家長既愛係幾恐怖下。 小朋友俾你鬧完打完用言語傷害完，佢地唔識講。你以為佢轉頭無事，原來已經值入心底。入埋血。之後會笑會玩但其實佢無得揀係咪？
以後，佢都會用同一方法去教自己既小朋友。
呀媽都係因為緊張你，知你做到但你只係唔夠專心，專心啲就做到架喇。 你以後會多謝我對你咁嚴，會多謝我令你讀到書，考到好學校好工作。
三思再三思
希望小朋友長大後，唔會愈行愈遠，亦唔會怕失怕，遇到困難時會回來媽媽身邊。