每年中秋都會有各式各樣的月餅賣，但米媽就喜歡自己動手做月餅與家人朋友一起分享，來得更有意思。
近年中秋都是熱辣辣咁過，所以透心涼又食極唔漏既雪糕月餅一定係首選啦~~想食既話買一盒只有4件月餅都要2百幾蚊….食一件又唔夠喉…兩件又肉赤…除非買一盒7件雪糕月餅，但係要4百幾蚊，幾貴下呢，講到底都只係朱古力同雪糕既mix & match….
其實，想食，你都做到，而且極簡單，3樣材料4個步驟，幾十蚊就得!想食咩味道，咩餡，咩配料，咩形狀以及朱古力既甜度都由你揀!
米媽今次就揀左完美既配搭，用比利時70%黑朱古力包住香濃抹茶雪糕，用北海道紅豆蓉做餡。一咬下去有脆皮黑朱古力既表層，而黑朱古力既苦又同入面抹茶雪糕既香滑同紅豆既甜互相中和..一脆一滑，一苦一甜，真係好夾同好好味~~~ 難唔難整?零難度，包成功!
材料: (平均4個份量,每個雪糕月餅約50克重)
1.
70%黑朱古力粒—90克克 (份量隨意，視乎你用的模具大小)
2.
抹茶雪糕--- 100克
3.
紅豆蓉—20克
4.
矽膠模—1個
做法:
1.
先將黑朱古力隔熱水座溶。
2.
把適量黑朱古力溶液薄薄一層平均塗滿整個模具內沒有空隙，放入雪櫃雪5-10分鐘至凝固。抹茶雪糕可以這時從雪櫃拿出回軟。
3.
把矽膠模取出，將抹茶雪糕加入模具中，倒至6成滿，將紅豆蓉平均分4份放在雪糕中間，之後再將雪糕倒至9成滿覆蓋餡料。把模具放入冰格冷藏約1-2小時直至雪糕變硬身。
4.
將模具取出，把剩餘朱古力重新隔熱水溶液後倒入模具內填平。放進冰格冷藏至完全硬身便可以取出脫模。 (冷藏時間視乎模具大小，平均約兩小時)
話咁快就完成喇~~~
米媽教路:
1.
記得先把模內填滿朱古力，之後雪糕，之後朱古力，每一層都是充分凝固才可再放入另一層材料，不然就會混和在一起。
2.
朱古力溶液不夠，可以再重新製作，隔熱水座溶就可以。
3.
朱古力皮可以視乎喜好加入乾果碎，例如花生粒，杏仁粒，增加口感。
4.
雪糕口味，餡料亦可以隨個人喜好。
希望你們喜歡米媽的中秋節食譜，多多支持。祝願各位中秋節快樂，世界各地和平，所有人都可以一家團圓，賞月共渡好時節。
米媽更多中秋月餅食譜可按以下連結:
食譜版權: 絲‧房菜SICI CHONG
https://www.facebook.com/sicikitchen/
沒有留言:
張貼留言